Ny leiar i Veitastrond Fotball; Kurt Heggestad

Det vert altså store endringar i adminstrasjonen til Veitastrond Fotball den kommande sesongen. Emil Heggestad har styrt klubben med jernhand i over 7 år, men no er hegmoniet hass over og han overlet stafettpinnen til Kurt Heggestad. I tillegg til å vera laget sin kanskje beste spelar vil Kurt den kommande sesongen vera både styremedlem, sportsleg leiar og hovudtrenar. Utvilsamt eit stort ansvar som no kviler på skuldrane til Kurt, men samstundes er det ei spanande tid som ventar for Veitastrond Fotball. Den daglege drifta av klubben var kanskje i ferd med å køyra seg fast i det same sporet, og ei lita endring i leiinga er forhåpentlegvis det som skal til for å komma innatt på rette leia.

Kurt Heggestad er 27 år og er veitastrending tvers igjennom. Etter over 10 år i Sogndal Fotball har han eit navn som er viden kjent langt utanom Stølsnestunellen, og det er den erfaringa og kunnskapen han sit att med etter denne tida me no håpar skal komma VIL-fotball til gode. At Kurt i tillegg har etablert seg med familien på Veitastrond, gjer til at han framstår som den perfekte leiar og ansikt utad for klubben vår.

Det var eit samla styre i klubben som støtta opp om Kurt til å bli ny sportsleg leiar!

I samtale med Veitastrond.com er det ein audmjuk hovudperson som no trer til i si nye rolle;

"Det er sjølvsagt ærefullt å få dette vervet og eg vonar det skal bli bra både for meg sjølv og klubben. I utgangspunktet har eg ikkje dei heilt store planane om å endra på så mykje, men heller syta for at me kan vidareføra det som klubben allereie står for", uttaler Kurt, medan han og innrømmer at han håpar på å få støtte og hjelp frå dei andre styremedlemmane i klubben til å gjera jobben sin "Ja så absolutt. Eg er heilt klart avhengig av å benytta meg av den kompentansen som allereie er i klubben. Saman er eg viss på at dette vil bli bra"

Ei av hovudoppgåvene den nye sportslege leiaren seg føre seg er å få satt ting litt meir i system. I staden for at få personar gjer veldig mykje, håpar han at mange skal gjera lite; "Det har vore tendensar til enkelt personar har gjort alt for mykje, og alt for stort ansvar har vore lagt på desse. Vårt mål framover er å delegera oppgåvene ut på fleire slik at klubben ikkje er så avhengig av få personar, og samstundes at me ikkje risikerar at nokon går leie", seier ein tydeleg engasjert leiar til heimesidene våre.

Trenarvervet

I tillegg til rolla som sportsleg leiar går og Kurt inn som likestilt hovutrenar med Emil Heggestad. Kurt vonar at han særleg her får nytta den erfaringa han dreg med seg frå øverste nivået i norsk fotball.

"Eg håpar me kan bruka tida på treningsfeltet til å terpa på enkelt deteljar for å heva nivået. Me kjem til å ha eit særleg fokus på den defansive delen av spelet, og kanskje ein gong for alle finna formelen for å tetta igjen forsvaret vårt", seier den ferske trenaren.

Han vert imidlertid ordknapp når me spør kvifor Richard Nes no er heilt ute av trenarteamet; "Det har eg eigentleg ingen kommentar til, men eg trur ikkje det var noko dramatikk i avgangen hass", avsluttar Kurt til Vetastrond.com.

Kurt er rett mann på rett stad

Avtroppande leiar Emil Heggestad er meir enn klar til å overlata ansvaret til Kurt, og han er samstundes klar til å støtta opp om Kurt sitt arbeid. Emil som held fram som styreleiar og hovudtrenar i klubben er og glad for at Morten Røstadbotten har takka ja til vera med i adminstrasjonen. På ein SMS til oss skriv han i kveld følgande;

"Det er med stor glede eg kan melda at vår eigen Kurt Heggestad tek over den sportslege leiinga av Veitastrond Fotball. Det var på høg tid med friskt blod, og med Kurt sin entusiasme, kunnskap og nettverk vil klubben ta nye steg framover. Med han får me ein heilt ny styrefunksjon. Klubben blir å kjenna godt igjen, men eg er sikker på at spelarar, støtteapparat og supporterar skal få sjå tydelege endringar.

Det at me og har fått med ein så god mann som Morten Røstadbotten i tillegg er som å få ein sekk med gullmyntar deisande i hovudet. Han vil vera med å tilføra klubben mykje med sin kompetanse innan da å driva fotballklubb. Han ha tross alt, saman med Kurt, vore på høgaste nivå i Norge - ikkje som spelar riktignok, men som materialforvaltar og alt muleg mann. Det er med stor audmjukhet eg ynskjer begge velkommen inn i leiinga til Veitastrond Fotball."

Med desse velvalgte orda frå Emil så gjenstår det berre for oss i Veitastrond.com å melda oss på i ynskje-velkommen-til-Kurt-klubben, og me ynskjer han og resten av leiinga lukke til med driftinga av VIL-fotball.